Taic Freumhan Coimhearsnachd

Tha Bòrd na Gàidhlig a' toirt cothruim às ùr do bhuidhnean taic-airgid fhaighinn airson pròiseactan a tha a' neartachadh na Gàidhlig anns a' choimhearsnachd, airson cuideachadh Plana Nàiseanta na Gàidhlig a chur an gnìomh. Tha maoin Taic Freumhan Coimhearsnachd fosgailte airson iarrtasan bho bhuidhnean air feadh Alba airson pròiseactan ùr-ghnathach a chur air adhart a bheir fàs air cleachdadh na Gàidhlig agus a neartaicheas misneachd sa chànan gu h-ionadail.

Cleachdaidh Bòrd na Gàidhlig a' mhaoin seo gus taic a chur ri pròiseactan a tha cuimsichte air a’ choimhearsnachd agus a bhios:

• a' neartachadh togail agus cleachdadh na Gàidhlig san dachaigh, no
• a’ neartachadh togail agus cleachdadh na Gàidhlig am measg na h-òigridh, no
• a’ neartachadh togail agus cleachdadh na Gàidhlig sa choimhearsnachd

Tha Taic Freumhan Coimhearsnachd fosgailte ri iarrtasan bho bhuidhnean coimhearsnachd, buidhnean saor-thoileach, gnothachasan beaga agus buidhnean eile a tha ag iarraidh gnìomhachdan Gàidhlig a bhrosnachadh ann an coimhearsnachdan no lìonra.

Tha cothrom aig buidhnean iarraidh taic thairis air dà bhliadhna.

'S e 12 Ògmhios 2009 an latha mu dheireadh airson iarrtasan a chur a-steach am-bliadhna.

Airson tuilleadh fiosrachaidh thoir sùil air www.bord-na-gaidhlig.org.uk, cuir fòn gu 01463 225454 no cuir post-d gu tabhartas@bng.org.uk